خالی اَکھ دا سُݨہَپ
خالی اَکھ دے سُݨہپ کوں ݙیکھ تاں سہی
خالی اَکھ دے سُݨہپ ءِچ وَسدا ہے
ہِک منظر حیرت ناکی دا
ہِک وُسعت سَت اَسماناں دی
ہِک قِصہ درد حیاتی دا
ہِک منظر حیرت ناکی دا
ہِک وُسعت سَت اَسماناں دی
ہِک قِصہ درد حیاتی دا
خالی اَکھ دیاں پِـپلیاں ہیٹھ اُنگدن
کِھپ لاݨے گھور سوالاں دے
کُجھ دُھوڑ شِکیـتاں شِکویاں دی
کُجھ خاکے حال بے حالاں دے
کِھپ لاݨے گھور سوالاں دے
کُجھ دُھوڑ شِکیـتاں شِکویاں دی
کُجھ خاکے حال بے حالاں دے
خالی اَکھ دی تَس نئیں مُک سڳدی
کہیں دجلے نال فُرات دے نال
خالی اَکھ دی بُکھ نئیں مُک سڳدی
کہیں ݙات زکواۃ خیرات دے نال
کہیں دجلے نال فُرات دے نال
خالی اَکھ دی بُکھ نئیں مُک سڳدی
کہیں ݙات زکواۃ خیرات دے نال
خالی اَکھ کوں کیا تشبیہہ ݙیواں
کیہڑے ݙُکھ دا دسترخوان آکھاں
ہِک وَسّوں ڄیڑھی اُڄڑ ڳئی
اینکوں روھی تھل دامان آکھاں
کیہڑے ݙُکھ دا دسترخوان آکھاں
ہِک وَسّوں ڄیڑھی اُڄڑ ڳئی
اینکوں روھی تھل دامان آکھاں
Share this:
